Акруговы суд у Варшаве прызнаў юрыдычна дапушчальнай экстрадыцыю расійскага археолага Аляксандра Буцягiна ва Украіну. Пра гэта паведаміў яго адвакат Адам Даманьскі. Рашэнне пакуль не з’яўляецца канчатковым і можа быць абскарджана. Паводле абаронцы, суд не прыняў аргументы абароны. Буцягiн рыхтуе скаргу і чакае пісьмовага абгрунтавання пастановы.
— Працэдура заключаецца ў тым, што ў выпадку пацвярджэння сённяшняга рашэння Апеляцыйным судом, справа накіроўваецца міністру юстыцыі Польшчы, менавіта ён прымае канчатковае рашэнне аб экстрадыцыі, — паведаміў адвакат.
Расіянін быў затрыманы ў снежні 2025 года супрацоўнікамі Агенцтва ўнутранай бяспекі Польшчы па запыце ўкраінскага боку. Украінская пракуратура падазрае яго ў наўмысным пашкоджанні археалагічнага комплексу «Старажытны горад Мірмекій» у Керчы, у акупаваным Расіяй Крыме, а таксама ў правядзенні незаконных раскопак.
У выпадку экстрадыцыі археолагу можа пагражаць да пяці гадоў зняволення, а таксама штраф.
iar/эж